Մամուլի հաղորդագրություն, 12.10.2014թ.

ԼՈՒՅՍ ՏԵՍԱՎ «ՎԻԿՏՈՐ ՀԱՄԲԱՐՁՈՒՄՅԱՆԻ ԿՅԱՆՔԸ և ԳՈՐԾՈՒՆԵՈՒԹՅՈՒՆԸ» ԳՐՔՈՒՅԿԸ

Լույս է տեսել «Վիկտոր Համբարձումյանի կյանքը և գործունեությունը» անգլերեն գրքույկը, որը կարող է լրացնել մեր մեծ գիտնականի մասին անգլերեն գրականության բացը և նախատեսված է արտասահմանյան գիտնականների և մեծ աստղագետի գիտական ժառանգությամբ բոլոր մյուս հետաքրքրվողների համար։ Գրքի հեղինակն է աստղագետ Արեգ Միքայելյանը, հրատարակիչը` «Անտարես», Երևան, 2014թ․, 48 էջ): Գրքույկը նվիրված է մեծագույն հայ աստղագետ և 20-րդ դարի խոշորագույն գիտնական Վիկտոր Համբարձումյանին, ով հիմնարար ներդրում ունի աստղագիտության և աստղաֆիզիկայի, տիեզերաբանության, տեսական ֆիզիկայի, մաթեմատիկայի և փիլիսոփայության բնագավառներում։

Գրքույկում այցեքարտի ձևով շարադրված է Վ.Հ․ Համբարձումյանի ողջ կյանքն ու գործունեությունը։ Այն բաղկացած է հետևյալ բաժիններից. Նախաբան, Համառոտ կենսագրություն, Կենսագրական ժամանակագրություն, Կարևորագույն գիտական արդյունքներ, Կարևորագույն գիտական հոդվածներ, Գրքեր, գրքույկներ և գրքերի խմբագրում, Զբաղեցրած պաշտոններ, Գիտական խորհուրդների և հանձնաժողովների ղեկավարում և անդամություն, Խմբագրական գործունեություն, Ակադեմիաների անդամակցություն, Գիտական ընկերությունների և կազմակերպությունների անդամակցություն, Համալսարանների պրոֆեսոր և պատվավոր դոկտոր, Կոչումներ, պարգևներ և մրցանակներ, Հասարակական գործունեություն), Գրքեր և այլ հրատարակություններ Համբարձումյանի մասին, ինչպես նաև Համբարձումյանին նվիրված գիտական և այլ երևույթներ:

Հայկական աստղագիտական ընկերություն