Մամուլի հաղորդագրություն #410, 05.02.2015թ.

ԼՈՒՅՍ ՏԵՍԱՎ ՀԱՅ-ՎՐԱՑԱԿԱՆ ԱՍՏՂԱԳԻՏԱԿԱՆ ԿՈԼՈՔՎԻՈՒՄԻ ՆՅՈՒԹԵՐԻ ԺՈՂՈՎԱԾՈՒՆ

ՀՀ ԳԱԱ Բյուրականի աստղադիտարանը հրատարակել է 2013թ. օգոստոսի 26-28-ին Բյուրականում տեղի ունեցած «Աստղերի անկայունությունը և էվոլյուցիան» թեմայով հայ-վրացական աստղագիտական կոլոքվիումի նյութերի ժողովածուն (խմբագիրներ՝ Հ.Ա. Հարությունյան, Ե.Հ. Նիկողոսյան, Ն.Դ. Մելիքյան։ Երևան, «Էդիթ Փրինթ», 2015թ., 158 էջ): Կոլոքվիումը նվիրված էր ակադ․ Լյուդվիկ Միրզոյանի 90-ամյա հոբելյանին։ Մասնակցում էին 35 աստղագետներ Բյուրականի և Վրաստանի Աբասթումանի աստղադիտարաններից։

Ժողովածուում ընդգրկված են կոլոքվիումի 27 զեկուցումներ, ինչպես նաև մի շարք օժանդակ նյութեր՝ Լ.Վ. Միրզոյանի կենսագրությունը, հայ-վրացական կոլոքվիումների համառոտ պատմությունը, մասնակիցների կազմը և այլն:

Հայ-վրացական համատեղ կոլոքվիումների ավանդույթը սկսվել է դեռևս Վիկտոր Համբարձումյանի կողմից, և սկսած 1974թ. տարեկան մեկական անգամ հայ և վրացի աստղագետները փոխադարձ այցելություններ էին կատարում Աբասթումանի և Բյուրականի աստղադիտարաններ։ Այդ հանդիպումները, բացի գիտական զեկուցումներից, ներառում են նաև քննարկումներ, մարզական խաղեր և այլն։ Կոլոքվիումները կանոնավոր շարունակվեցին մինչև 1988թ., այնուհետև, 9 տարվա դադարից հետո նորից վերականգնվեցին 1997-ին, և 2013թ. կոլոքվիումն արդեն թվով 15-րդն էր։ Նման կոլոքվիումներ են նախատեսվում նաև իրանցի աստղագետների հետ։

Հայկական աստղագիտական ընկերություն